Kabridahar City Administration

Banka Qoraxey oo Barwaaqo ah !

Dabaaldegga Ciidul Adxaa si weyn looga oogay magaalada Qabridahare, halkaas oo shacabka si wadajir ah ugu tukadeen labada rakcadood ee salaadda Ciidda.

Dadweynaha ayaa isugu soo baxay fagaaraha salaadda iyagoo muujinayay farxad iyo damaashaad, isla markaana isugu hambalyeynayay munaasabadda barakaysan ee Ciidul Adxa. Salaadda kaddib, culumaa’udiinka magaalada ayaa jeediyay khudbado diini ah oo ku saabsan qiimaha Ciiddu leedahay, iyagoo bulshada ku dardaarmay inay iscaawiyaan, isu naxariistaan, isla markaana garab istaagaan dadka danyarta ah.

Guddoomiyaha Gobolka Qoraxay, Mudane Shaafi Maxamed Cabdi, iyo ku-xigeenka maamulka magaalada, Mudane Cabdifataax Deeq Khalif, ayaa shacabka u diray hambalyo ku aaddan Ciidda, iyagoo ugu baaqay inay sii xoojiyaan nabadda, wadajirka iyo horumarinta magaalada.

Munaasabadda Ciidul Adxaa waxay ku soo dhammaatay jawi farxad, xasillooni iyo isjacayl bulsho leh, iyadoo si weyn looga dareemayay isku duubni, walaaltinimo iyo midnimo shacabka dhexdeeda ah.

Kabridahar City Administration

Taageerayaasha Prosperity Party ee xarunta gobolka Qoraxay ayaa maanta dhigay isu-soo-bax ballaadhan oo ay ku muujiyeen taageeradooda buuxda ee xisbiga iyo musharraxiintiisa heer deegaan iyo heer qaran ee Doorashada 7-aad ee dalka.

Kumannaan taageerayaal ah ayaa buux dhaafiyey waddooyinka waaweyn ee magaalada Qabridahar, iyagoo lulaya astaanta xisbiga kana qeyb qaadanaya socod ballaadhan oo si heer sare ah loo soo agaasimay.

Munaasabadda waxaa horkacayay Madaxa Arrimaha Siyaasadda iyo Kobcinta Awoodda Prosperity Party ee Soomaalida, Mudane Cabdiraxmaan Axmed Xasan, musharraxiinta xisbiga ee gobolka Qoraxay iyo maamulka magaalada Qabridahar.

Mudane Cabdiraxmaan Axmed Xasan ayaa fagaaraha kula hadlay taageerayaasha, isagoo uga mahadceliyey taageerada diirran ee ay muujiyeen, isla markaana bulshada ugu baaqay inay codkooda siiyaan musharraxiinta xisbiga.

Isu-soo-baxan ballaadhan ayaa ahaa gunaanadka ololaha Prosperity Party ee Doorashada 7-aad.

Kabridahar City Administration

Waxaan si rasmi ah u bilawnay mashruuca carro-dhigga waddada ee Xaafadda 4aad, gaar ahaan deegaanka Tuulo-Gacandhi — mashruuc ay bulshada xaafaddu baahi u qabeen.

Xaafaddan oo dhulkeedu yahay carro-madow, waxaa xilliyada roobka adkaan jiray isu socodka gaadiidka iyo dadka, taas oo si weyn u saameyn jirtay nolol maalmeedka bulshada.

Mashruucan carro-dhigga ahi wuxuu door muhiim ah ka qaadan doonaa horumarinta adeegyada xaafadda, isagoo fududeyn doona isu socodka, korna u qaadi doona bilicda deegaanka iyo adeegyada bulshada. Sidoo kale, wuxuu yareyn doonaa caqabadihii ka dhallan jiray waddooyinka dhoobada ah iyo biyaha fariista xilliyada roobabka.

Waxaan rajaynaynaa in mashruucani noqdo mid wax weyn ka beddela nolosha bulshada deegaanka, isla markaana qayb ka noqda horumarka joogtada ah ee magaalada.

💡 Alxamdulillaah

Muddo dheer kadib, waxaa dib loo helay laydhkii korontada ee ka maqnaa Magaalada Qabridaharre iyo guud ahaan nawaaxigeeda.

Bulshada magaalada iyo deegaanada ku xeeran waxay muddo la daalaa dhacayeen maqnaanshaha adeegga korontada, hase yeeshee maanta waxaa dib u ifay iftiinkii magaalada.

Waxaan u mahadcelinaynaa dhammaan dhinacyadii ka shaqeeyay soo celinta adeeggan muhiimka ah, waxaana rajaynaynaa inuu noqdo mid joogto ah oo bulshada wax weyn ka tari doona.

Qabridaharre oo iftiintay — horumar iyo rejo cusub.

Kabridahar City Administration

Saaka waxaa si habsami leh u qabsoomay shirka amniga ee Gobolka Qoraxey iyo Maamulka Magaalada Qabridaharre, kulankaas oo si qoto dheer diiradda loogu saaray xaaladda amni ee magaalada iyo guud ahaan gobolka, iyo sidoo kale u diyaar-garowga munaasabadaha waaweyn ee inagu soo wajahan.

Shirka waxaa si gaar ah diiradda loogu saaray:

✅ Gunaanadka ol’olaha doorashada
✅ U diyaar-garowga Ciida Barakaysan ee Ciidul Adxa
✅ Sugidda amniga Maalinta Codbixinta Doorashada

Waxaa la isla qaatay muhiimadda ay leedahay iskaashiga bulshada iyo hay’adaha amniga si loo xaqiijiyo nabadgelyo waarta iyo xasillooni bulsho.

Ugu dambayn, waxaan ugu baaqaynaa bulshada guud ahaan, gaar ahaan dhalinyarada, inay noqdaan hormuudka nabadda, midnimada iyo wadajirka bulshada.

🕊️ Nabadgelyadu waa masuuliyad wadajir ah.

Kabridahar City Administration

Qayb kamid ah hoggaaminta Maamulka Magaalada Qabridaharre iyo dhalinyarta magaalada ayaa maanta booqasho iyo kormeer ku tagay garoonka kubadda cagta ee magaalada, halkaas oo ay uga kuurgaleen heerka uu marayo dhismaha garoonka.

Waxaa si cad uga muuqda dadaal, shaqo hufan iyo horumar degdeg ah, iyadoo mashruucu ku socdo xawaare wanaagsan oo rajo weyn gelinaya bulshada magaalada. Garoonkan wuxuu door weyn ka qaadan doonaa horumarinta ciyaaraha, dhalinyarada iyo bilicda guud ee Qabridaharre.






Kabridahar City Administration