أحذر ايكيا مصر

يعني من سنة اشتريت وحدتين للحمام من ايكيا زي اللي في الصورة. من فترة واحدة منهم باظت وبطلت تنور ولقيت اليونت اللي بتوصل الكهربا لللمض محروقة مع العلم ان الوحدتين جنب بعض بالظبط ومتوصلين بنفس زرار الكهربا.
روحت ايكيا علشان اشتري لمض وبديل لليونت اللي اتحرقت خدمة العملا قالولي مابنبعش اللمض دي ولا اليونتس لوحدها وكان ممثل خدمة العملا قمة في قلة الذوق والهمجية وقاللي زي ما بجيب شاشة كمبيوتر او تلفزيون ويبوظوا برميهم اعمل كدا مع الوحدة اللي بطلت تنور!!!! قلتله لو لمبة النور اللي ع الجنب في المونيتور باظت هركب لمبة تانية مش هرمي الشاشة
!
قاللي ان المفروض اللمض دي تعيش ٣٠ سنة وانها مش مشكلته انها باظت بدري!!! امال مشكلة مين؟ العميل اللي خلاص اشترى ولبس؟!
قاللي غالباً حصل حاجة في تيار الكهربا وحرقها مع العلم ان الوحدة التانية متوصلة بنفس زرار الكهربا وشغالة زي الفل! وكمان لنفترض انه تيار الكهربا حصل فيه لخبطة دي حاجة مش في ايدينا والمفروض يبيعوا الحاجة متناسبة مع ظروف البلد اللي بتتباع فيها او يوفروا لمض ويونتس للناس تشتريهم!
كمان انا مطلبتش انهم يغيروها على حسابهم مع ان دا حقي لو هي المفروض تعيش ٣٠ سنة ومكملتش سنة!!! انا هغيرها على حسابي بس يبيعولي اللمض واليونت بس لا حياة لمن تنادي!
مانصحش اي حد يجيب ايييييي حاجة فيها اضاءة من ايكيا لان مش هتلاقي لمض ولا يونتس مناسبة ليها في السوق ولا في ايكيا واحتمال ممثل خدمة العملا كمان يقل ادبه عليك...