15/05/2019
شراء الموبليا عملية مهمة وصعبة كلنا بنمر بيها، وفيه ناس كتير بتقع فى مشاكل علشان معندهمش خبرة في الموضوع ده، بس احنا هنقولك على شويه معلومات لازم تعرفهم قبل متشترى:
1. حدد مساحة المكان الأول، المساحة بتتحكم فى نوع الاثاث وحجمه، يعنى المساحة الصغيرة مينفعش معاها الأثاث الكلاسيكي أو اللى فيه شغل كثير، يُفضل الأثاث الحديث «مودرن» علشان بيدى إحساس بالبساطة والإتساع.
2. حط ميزانية للقطع الى عايز تشتريها، علشان متشتريش قطع غالية وتخلص عليها الميزانية وبعدين تكتشف انك لسه مجبتش حاجات كتير. ممكن تنزل تلف فى المعارض او تدور على النت عشان تعرف متوسط الأسعار وتعمل ميزانية مبدئية تشتغل عليها.
3. اسأل عند اكتر من واحد قبل ما تاخد القرار وشوف حاجات كتير علشان متشتريش حاجة و تندم بعد كدة لو لقيت حاجة أحسن، ومتخليش تركيزك على اسم اللى بتشترى منه، ركز على الجوده والسعر. واسأل كمان لو فيه شحن لحد البيت عشان متوجعش دماغك في النقل، ده غير تكلفتة.
4. اسأل على الخامات اللى معمول منها العفش، اوض النوم، النيش، الدواليب، سطح الترابيزات، المكاتب والسفرة بيتصنعوا من الخشب الكونتر. والكونتر يعتبر من الخشب المُصنَع على عكس الزان والموسكى والأرو اخشاب طبيعية. والأنواع الأفضل بالترتيب من وجهة نظرنا هى (الكونتر الطبقات – جود وود – وطنية – فنية) ولو خبطت على الخشب ولقيت صوت مكتوم ده دليل على ان الخشب كويس.
5. خشب الرُكن والأنتريهات يفضل يكون زان أحمر، والزان الأحمر الموجود في مصر فيه منه أنواع والأفضل بالترتيب (الروماني - AB - BC- الكلف) ويفضل يكون السمك مش اقل من 4 سم.
6. كثافة السفنج في الركن والأنتريهات كل ما بتزيد كل ما هيزيد المدة اللى ممكن يهبط فيها السفنج، وتقدر تعرف السفنج اللى كثافته عالية لما تضغط عليه بصباعك مش هيسيب مكان وهيرجع بسرعة بعكس السفنج اللى كثاقته قليلة هياخد وقت وهيعلم وفي كل الأحول هتحتاج يكون فوق السفنج طبقة او طبقتين من الفيبر علشان يبقى مُريح. وخلى بالك ان المخدات لازم تكون فيبر 100%.
7. المِجرى بتاعت الادراج فيها اكتر من نوع بس المنتشر (المرحلة الواحدة - المرحلتين - السوفت كلوز) المرحلة الواحدة الدرج مش بيطلع بكامل حجمه على عكس المرحلتين. اما السوفت كلوز فهو زي المرحلتين بس ممكن بلمسة واحده يقفل وكمان بيجي في الأخر ويقفل ببطء من غير ما يخبط ولا يعمل صوت.
8. سُمك الزجاج ميقلش عن 8 ملي، وبالنسبة للرخام فكل لون بيفرق عن التاني، بس بشكل عام ارخص الأنواع هي الأصفر والرمادي والأحمر المنقط والأفضل منهم هو الأخضر. وافضل نوع رخام هو الأسود المنقط ذهبى او فضى.
9. لو هتعمل حاجة عمولة شوف نجار انت واثق فيه واتفق على كل حاجة الأول وحاول تشرح اللى انت عايزه بالتفصيل علشان ميحصلش سوء تفاهم بعدين. ولو هتشترى جاهز امشى على الخطوات اللى قولناها وممكن تقرأ اكتر فى مكان تانى. ولو حاسس ان الموضوع لسه صعب عليك ممكن تاخد نجار معاك هيبقى فاهم اكتر، بس لازم يبقى ثقة علشان ممكن يظبط مع صاحب المعرض وياخد عمولة.
10. أخيراً اشترى الحاجات الضرورية لشقتك بس، متجبش حاجات مش هتستخدمها وتعملك زحمة على الفاضى وتحسسك بعدم الراحة. وخليك فاكر وانت بتشترى ان دى حاجه مش هتشتريها كل يوم، يعنى لازم تجيب حاجه تعييش معاك.
لو عايز تعرف سعر حاجة معينة ممكن تبعتلنا صورها واحنا هنقولك بتكلف كام وايه افضل الخامات اللى بتتصنع منها. ولو عندك اى استفسارات متعلقه بالموبيليا عموماً أو موضوع عايزنا نتكلم فيه بعدين ابعتلنا برضه واحنا هنقوم بالواجب :D
11/03/2018
10/03/2018
10/03/2018