11/10/2026
वीरगन्ज ८ मा वर्षौंदेखिको हाईटेन्सन लाइनको जोखिम हट्यो: रास्वपा वडा सभापति गुप्ताको पहलमा विद्युत् प्राधिकरणद्वारा तार र पोल व्यवस्थापन
वीरगन्ज, २६ असोज ।
वीरगन्ज महानगरपालिका वडा नं. ८ मा राष्ट्रिय स्वतन्त्र पार्टी (रास्वपा) का सभापति रवि कुमार गुप्ताको पहलमा र नेपाल विद्युत् प्राधिकरणको प्राविधिक सहयोगमा स्थानीय टोलवासीलाई ठूलो जोखिमबाट मुक्ति मिलेको छ ।
लामो समयदेखि टोलबासीलाई उच्च जोखिममा राख्दै आएको हाईटेन्सन नांगो तार र जिर्ण पोलहरूलाई व्यवस्थित गर्ने कार्य सफलतापूर्वक सम्पन्न भएको छ । उक्त स्थानमा रहेको प्यानारोमा रोलिङ मिल्स समेतको सहकार्यमा पुरानो हाइटेन्सन लाइन स्थानान्तरण गरी नयाँ सुरक्षित इन्सुलेटेड तार जडान गरिएको हो । यसका साथै, जोखिमयुक्त अवस्थामा रहेका पुराना विद्युतका पोलहरूलाई क्रेनको मद्दतले पूर्ण रूपमा हटाइएको छ ।
यस महत्त्वपूर्ण एवं उदाहरणीय कार्यमा नेपाल विद्युत् प्राधिकरणका प्रमुख, टोल सुधार समितिका अध्यक्ष सुरेश बाठ्ठल तथा रास्वपाका जुझारु नेताहरू श्रवण साह, मो. जाहिद हवारी, मनीष प्रजापति र लक्ष्मण श्रेष्ठ लगायतका स्थानीय अगुवाहरूको सक्रिय सहभागिता तथा विशेष सहयोग रहेको थियो । तार र पोल व्यवस्थापन भएसँगै स्थानीय बासिन्दाहरूले राहतको महसुस गर्दै खुसी व्यक्त गरेका छन् ।
